Египетийн Ерөнхийлөгч Мухаммед Мурси 572 хүнд өршөөл үзүүлэх тухай зарлигт гарын үсэг зурсан тухай 2011 оны хувьсгалын дараа ял шийтгүүлсэн хүмүүсийн хэргийг мөрдөн шалгах улсын комиссын төлөөлөгч Махмуд Фаузи мэдээллээ.
Өршөөлд хамрагдсан хүмүүсийн дийлэнх нь буюу 532 нь цэргийн шүүхээр ял шийтгүүлсэн энгийн иргэд, үлдсэн 40 нь жижиг гэмт хэрэг үйлдсэн байсныг Фаузи тэмдэглэжээ.
Хэдэн өдрийн өмнө 2011 оны хувьсгалын дараа ял шийтгүүлсэн хүмүүсийн хэргийг мөрдөн шалгах улсын комисс Ерөнхийлөгчдөө шоронд хоригдсоор байгаа 700 орчим хүнийг суллахыг зөвлөсөн аж.
Тус комисс 2011 оны нэгдүгээр сарын 25-наас 2012 оны зургадугаар сарын 30-ны дотор буюу эрх мэдэл Зэвсэгт хүчний дээд зөвлөлөөс бүх ард түмний сонгосон төрийн шинэ тэргүүнд шилжих хүртэл хугацаанд цэргийн болон иргэний шүүхийн шийдвэрээр ял шийтгэсэн хэргүүдтэй танилцжээ.
Улсын комисс тусгай илтгэлээ Мурсид илгээхдээ лалын шашинтнуудын ариун Рамадан сар эхлэхээс өмнө буюу долдугаар сарын 20-ноос өмнө нэр заасан хүмүүсийг суллах тухай баримт бичигт гарын үсэг зурахыг хүссэн байна.
Ойрын хугацаанд тус комисс 2011 оны хавраас 2012 оны зургадугаар сарын сүүлч хүртэл хугацаанд иргэний шүүхээр ял шийтгүүлсэн хүмүүсийн хэргийг шалгах ажилдаа орох аж.

З.Амгалан www.T1771.Tk