Ярилцлага: 
Сүх жанжны дүрийг мөнхөлсөн болохоор дахин кинонд тоглохгүй

"Долоон бурхан харвадаггүй” түүхэн уран сайхны кинонд Сүх жанжны дүрийг чадварлаг бүтээгээд зогсохгүй Сүхбаатар жанжинтэй зүс царайгаа тун адил гэгддэг залуу жүжигчин Д.Эрдэнэ-Мөнх "Academy awards-2012” кино наадамд дээрх бүтээлээр "Шилдэг эрэгтэй гол дүр” номинацид нэр дэвшсэн. Тэрбээр энэ шагналыг авч чадаагүй ч "Долоон бурхан харвадаггүй” кино нь  18 номинацид нэр дэвшин "Шилдэг зураач”-ийн шагналыг Ж.Цог, Н.Батжаргал нар, "Шилдэг монтаж”-ийн шагналыг Ш.Мөнхбат хүртсэн. 

Залуу жүжигчин Д.Эрдэнэ-Мөнхийн хувьд мэргэжлийн жүжигчин биш ч жанжины дүрд мэргэжлийнхнээс дутахгүй сайн тоглосон нь өсөх ирээдүйтэй жүжигчин гэдгээ баталсан. 

Тиймдээ ч Д.Эрдэнэ-Мөнхийн гар утас завсар зайгүй хангинаж, кинонд тоглуулах урилга, заллагад дарагдсаар буй гэнэ. 

Харин тэрбээр "Аугаа удирдагч Дамдины Сүхбаатарыг мэдэхгүй хүн байхгүй. Монголын ард түмний сэтгэл зүрхний гүнд үүрд хадаастай үлдсэн энэ эрхэм хүний дүрийг дэлгэцэнд буулгасандаа баярлаж явдаг. Би хилийн шалган нэвтрүүлэх "Буянт-Ухаа” боомтын шалгагч, офицер хүн. Одоогоор ямар ч шинэ уран бүтээл дээр ажиллаагүй, үндсэн ажлаа хийж байгаа. Намайг "Долоо бурхан харвадаггүй” кинонд тоглосноос хойш кинонд тоглох урилга олон ирсэн. Хамгийн сүүлд хилийн цэргийн амьдралыг харуулсан 60 ангит "Босго тотго” кинонд тоглооч гэсэн санал ирсэн ч би хүлээж аваагүй. Учир нь  Д.Сүхбаатар гэдэг аугаа баатар хүний дүрийг дэлгэцэнд мөнхөлчихөөд дахин өөр дүрд тогловол манай киноны нэр хүнд, гаргасан дүр маань үнэгүйдчихэнэ гэж бодсон. Тийм  учраас одоогоор дахин ямар нэг кинонд тоглох сонирхол алга. Д.Сүхбаатарын дүрд тоглосон юм чинь тэр чигээрээ энэ дүрээ авч явах ёстой гэж бодож байна” гэв.