Мэдээ, мэдээлэл::
Оюутны 70200 төгрөгийг идсэн хэргээр их, дээд сургуулиудын захирлууд шалгагдаж байна
"Ингэх гээд байсан юм” гэдэг кино шиг болох гээд байсан зүйл цаг хугацаа
нь хожимдсон ч болж байна, цаана чинь. Татварын ерөнхий газрын дарга
нарын хэргийн талаар лавлах санаатай Авлигатай тэмцэх газрын хэвлэл
мэдээллийн алба руу утас цохитол харин өөдөөс илүү сонирхолтой мэдээлэл
өглөө.
Монголын үндэсний дээд сургуулиас эхлээд "Их засаг” их
сургуулиар үргэлжилсэн томоохон их, дээд сургуулиудын захирал,
нягтлангуудыг шалгахаар болжээ. Мөн нэрийг нь нууцалсан хэд хэдэн их,
дээд сургуулиудын захирлууд аль хэдийнэ баригдаж, тэдэнд эрүү үүсгэсэн
гэх мэдээлэл ч байна. Учир нь, одоогоос жил гаруйн өмнө олгосон оюутны
сар бүрийн тэтгэмж 70200 төгрөгийг бөөнд нь зувчуулан идсэн хэрэг ийнхүү
сөхөгджээ.
Авлигатай тэмцэх газар олон оюутны санал гомдол,
мэдээлэл дээр үндэслэн энэхүү хэргийг мөрдөн шалгаж эхлүүлсэн бөгөөд
ирэх долоон хоногт олон нийтэд хэн хэн гэгч захирлууд оюутнуудад очих
ёстой байсан 70200 төгрөгийг замаас нь завшин бор ходоодоо
бондойлгосныг зарлан тунхаглах юм гэнэ. Нүгэл нүдээ олно гэдэг л энэ
байх. Олон аавын охин, ээжийн хүү 70200 төгрөгөө хичээл тасалсан,
сургуулийн байрны өргөтгөлийн хандив, санхүүжилт, сурлага хүмүүжлийн
доголдол гэсэн шалтгаануудаар авч чадаагүй байсан хэрэг ийнхүү эцэслэн
шийдэгдэх нь бололтой.