Н.Энхбаярын охин Э.Бямбадуламыг аавынх нь хэргээс болж ажлаас нь халжээ

Монгол Улсын Ерөнхийлөгч асан Н.Энхбаярыг эхлээд сэжигтнээр татаад одоо яллагдагч болголоо. Түүний хийсэн хэрэг гэгчийг бараг Монгол даяараа мэддэг болов. Гэвч Н.Энхбаярыг гэм буруутай эсэхийг шүүх эцэслэн шийдээгүй байна. Н.Энхбаяр ч өөрөө хүлээн зөвшөөрөхгүй өнөөдрийг хүрэв.
Гэвч Н.Энхбаярын гэх хэрэг О.Цолмонгийн хэлснээр олон хүнийг хөлдөө чирч эхэллээ. Уг хэрэгт холбогдуулан олон хүнээс байцаалт, мэдүүлэг авч эхэлсэн. Зарим гэрчүүд хилийн дээс алхаж гараад олдохгүй байгаа. Үүний зэрэгцээ НЭнхбаярын гэр бүлийнхэнийг гадуурхах гэсэн хандлага үзэл ч гарч эхэлсэн бололтой. Учир нь Н.Энхбаярын том охин Э.Бямбадулам Азийн хөгжлийн банкинд ажиллаж байжээ. Гэтэл танай аав нь авлигалын хэргээр шалгагдаж эхлээд яллагдагчаар татагдлаа гэсэн үндэслэлээр ажлаас нь чөлөөлсөн тухай мэдээлэл тарж байна. Азийн хөгжлийн банкны удирдлага манайх олон улсын байгууллага учир ажиллаж буй хүмүүс авлигалаас ангид байх ёстой гэсэн дүрэм журамтай. Танай ааваас болоод манай байгууллагын нэр хүндэд сөрөг нөлөөлөл үзүүлж мэдэх юм гэсэн эелдэгхэн тайлбараар Э.Бямбадуламыг ажлаас нь чөлөөлсөн сурагтай. Ийнхүү Н.Энхбаярын хэрэг охиныг нь ч ажилгүй болголоо. Ер нь Н.Энхбаярын хэрэг эцэслэн шийдэгдээгүй байхад ийм шийдвэр гаргана гэдэг бол шударга бус асуудал л даа. Тэгээд ч эцэгийн хийсэн хэргийг үр хүүхдэд нь тохож болохгүй.

Н.Энхбаярын охин Э.Бямбадуламыг ажлаас нь чөлөөлсөн гэх Азийн хөгжлийн банк гэж ямар байгууллага байдаг вэ? Монголд ямар төсөл, хөтөлбөр хэрэгжүүлдэг вэ гэдгийг сонирхоё.

Азийн хөгжлийн банк нь Ази-Номхон далайн бүс нутагт хөгжиж буй орнуудын нийгэм эдийн засгийг дэмжин туслах үйл ажиллагаа явуулдаг санхүүгийн байгууллага л даа.
Азийн хөгжлийн банк нь анх Филлипиний Манила хотод 1966 онд байгуулагдсан. Харин манай улсад 1991 онд салбараа нээж, суурин төлөөлөгчийн газраа байгуулсан. Сөүлийн гудамж дахь Эм-Си Эс плазагийн байранд байрладаг. Азийн хөгжлийн банк нь хөгжиж буй орнуудын эдийн засгийн өсөлтийг дэмжих, ядуурлыг бууруулах, эмэгтэйчүүдийн эрхийг хангах нөхцлийг дээшлүүлэх, хүний нөөцийг хөгжүүлэх, байгаль орчин баялагийн менежментийг дээшлүүлэх томоохон зорилтыг хэрэгжүүлдэг. Энэ зорилгоор манайд томоохон төсөл хэрэгжүүлж ирсэн. Одоогийн байдлаар азийн хөгжлийн банк манай улсад 36 төсөл, хөтөлбөр хэрэгжүүлсэн бөгөөд 700 гаруй сая ам долларын зээл, 300 орчим сая ам долларын буцалтгүй тусламж үзүүлсэн гэсэн тоон үзүүлэлт гарчээ.
Азийн хөгжлийн банк нь 55 гишүүн оронтой. Эдгээрийн 39 нь азийн бүс нутагт, үлдсэн 16 нь өөр бүс нутагт хамаардаг. Мөн захирлын зөвлөлийн 12 гишүүний 9 нь азийн бүс нутгийнх. Бусад нь азийн бус орны төлөөлөгч юм.
Манай улсын зах зээлийн харилцаанд шилжсэнээс хойш дэмжиж ирсэн ийм нэгэн байгууллага Н.Энхбаярын охиныг аав нь гэмт хэрэгт холбогдлоо гэсэн үндэслэлээр ажлаас чөлөөлснийг олон нийт янз бүрийн байр сууринаас тайлбарлаж эхэллээ.