Эрүүл мэнд
Та ханиад хүрчихсэн юм биш биз
Хүйтний улирал эхлэхтэй зэрэгцээд л ханиад, томуу газар авдаг. Жаахан даарчихвал ханиад зооглох нь тэр дээ.
Ханиад хүрэхээр хамаг бие шархиран, хамраас шингэн нус гоожино,
хоолой өвдөнө, найтаасны улмаас нүд бүлцийж нулимс гоождог. Тиймээс
ханиадыг хүндрэхээс нь өмнө эртхэн зогсоох хэрэгтэй юм. Хамрын ханиад
нь олон төрлийн нянгаар үүсгэгддэг учир бидний бие организмд түүний
эсрэг тогтмол дархлаа байдаггүй юм байна.
Зарим нэгэн хүмүүс ханиад хүрэхэд юунд нь санаа зовдог юм, эм уугаад л
эдгэрчихнэ гэж бодож айж болох юм. Тийм ээ, ханиадны эсрэг эм бэлдмэл
олон байдаг. Гэхдээ тэд бүгд л парацетамол болон түүнтэй төстэй эмний
хүчээр халуун буулгах, амин дэм С-гийн тусламжтайгаар дархлаа дэмжих
үйлчилгээтэй учираас удаан хугацааны турш хэрэглэвэл бусад эрхтэнд
муугаар нөлөөлдөг байна. Заавал ч үгүй эм хэрэглэж биеэ химийн бодисоор
хордуулах шаардлагагүй. Учир нь дөнгөж ханиад туссан шинж тэмдэг
эхлэмэгц эм хэрэглэхгүйгээр, биеийнхээ дархлааг сайжруулж эдгээх арга
байна. Ингээд дараах хэдэн зөвлөгөөг хүргэе!
1. Ханиадны эхний шинж тэмдэг илрэнгүүт ядаж ганц өдөр
гэртээ өнжиж хагас хэвтрийн дэглэм баримтлахыг хичээх нь зүйтэй. Өвчний
эхний үед бие организмд амар тайван байдал чухал, тиймээс болж өгвөл
сайтар унтаж амрах хэрэгтэй.
2. Дархлаа дэмжих бэлдмэл хэрэглэж дархлааныхаа системийг бэхжүүлэх хэрэгтэй.
3. Ханиадыг эмчлэхэд бүлээн шингэн зүйл их хэмжээгээр
уух хэрэгтэй. Энэ нь зөгийн бал юмуу нимбэгтэй цай, аньсны шүүс байвал
зүгээр. /Жич зөгийн балыг 40-өөс доош хэмтэй бүлээн усанд найруулна/
4. Хамраа давсны уусмалаар угаа. Цайны халбагаар тал
давсыг нэг аяга буцалсан бүлээн усанд уусгаад 3-4 удаа хамартаа соруулж
зайлна.
5. Халуун устай онгоцонд орох. Гэхдээ ханиад дөнгөж эхэлж байгаа үед, халуураагүй тохиолдолд гэдгийг бүү март.
6. Өрөө тасалгаандаа заавал агаар оруул. Ханиад хүрсэн үед цэвэр агаар маш чухал. Агааржуулах үедээ түр өөр өрөөндөө ороорой.
7. Хөлөө аль болох дулаан байлга.
8. Зөв хоолло. Ханиад хүрсэн үед тахиа болон загасны
шөл, шинэхэн жимс, ногоо идэх нь тустай. Хэрвээ таны хоолой хөндүүрлээд
юм залгихад хүндрэлтэй байгаа бол жимс ногооны шинэхэн шүүс уугаарай.
9. Ханиадтай хийх тэмцэлд С амин дэмийн хэрэгцээ
ихэсдэг тул түүгээр баялаг хоол хүнс хэрэглээрэй. Жүрж, нимбэг зэрэг
жимсэнд энэ амин дэм их хэмжээгээр агуулагддаг. Харин нэг дор эмийн
сангуудаар худалдаалагддаг С амин дэмийг найруулан уух нь маш хортой
гэдгийг санаарай. Ханиадтай тэмцэх үед В бүлгийн амин дэмийн хэрэгцээ ч
ихэсдэг. Тэдгээр нь бүх төрлийн самранд ихээр агуулагддаг байна
