Танин мэдэхүй
Согтууруулах ундааг хэтрүүлэн хэрэглэх нь эмэгтэйчүүдэд илүү аюултай тусдаг
Согтууруулах ундааг ойр ойрхон хэтрүүлэн хэрэглэдэг эмэгтэйчүүд онц
эрсдэлтэй бүлэгт багтав. Эрдэмтдийн хамгийн сүүлд явуулсан судалгаагаар
ийм хорт дуршилтай эмэгтэйчүүд бусдыгаа бодвол өөд болох магадлал тав
дахин их байдаг нь тогтоогджээ. Судлаачид согтууруулах ундааг хэтрүүлэн
хэрэглэдэг 149 хүнийг 14 жилийн туршид ажигласан байна. Эрчүүдийн хувьд
балгах дуртай нь нас барах явдал хоёр дахин их байдаг аж. Архинд донтсон
хүмүүс бусдыгаа бодвол 20 жилийн өмнө нүд аньдаг нь тогтоогджээ. Эмч
нар эмэгтэйчүүдийг анхааралтай ажиглах ёстойг эрдэмтэд өгүүлж байна. Тэд
хүүхнүүдийн хэрэглэж байгаа согтууруулах ундааны хэмжээг сонирхож байх
ёстой гэнэ. Австралийн Хар тамхины судалгааны үндэсний хүрээлэнгийн
захирал Стив Олсоп хүйсийн биологийн ялгаа энд гол үүрэгтэйг онцлов.
Эрчүүд
эмэгтэйчүүдээс том биетэй байдаг билээ. Тэдний биед ус ихээр
агуулагддаг ч өөх тослог бага байдаг юм. Тэгэхээр эмэгтэйчүүдийн цусан
дахь спиртийн агууламж ямар ч тохиолдолд их байх аж. Энэ нь гүн
хордлогод орох магадлалыг нэмэгдүүлдэг байна. Дээр нь эмэгтэйчүүд архинд
донтох явц хурдан өрнөдөг. Тэд асар богино хугацаанд бие махбодоо
хордуулж, дуршилтай болдог гэнэ. Тиймээс сүүлийн жилүүдэд архинд орсон
эмэгтэйчүүдийн нас баралтын түвшин эрчүүдийнхээс хамаагүй их байгаа нь
тодорхой. Үнэндээ бол эрчүүд архи уусан үедээ тээврийн хэрэгсэл жолоодож
байгаад осолд орж нас барах нь их байдаг аж. Согтууруулах ундааг
хэтрүүлэн хэрэглэдэг хүмүүс зүрх, судасны өвчинд амархан нэрвэгддэг
бөгөөд уураг тархи, бөөр, элэгний эмгэгтэй болох нь элбэг байдаг билээ.