Улс төр::
"Холимог хуурга” шиг шинэхэн парламент
Ирэх дөрвөн жилд Төр барих "Хуртай, хувьтай” шинэхэн УИХ-ын гишүүд
өнөөдөр тангарагаа өргөж, анхдугаар чуулганаа хуралдууллаа. Энэ удаагийн
УИХ-ын тал нь өөрчлөгджээ. МАН-ынхан мөнгөтэй залуусаа, АН-ынхан
өнгөтэй хүүхнүүдээ гаргасан давгүй сайхан УИХ бүрдсэн мэт сэтгэгдэл
төрүүлж байна. Зарим хүмүүс "Хоолоор бол холимог хуурга шиг, хөгжимөөр
бол найрал хөгжим шиг их аяатайхан бүтэцтэй болчихлоо шүү” хэмээн уулга
алдаж байх юм.
Эл өдөр аргын тооллын долдугаар сарын 6. Билгийн тооллын 18. Гурван
хөх мэнгэтэй шар "луу” өдөр бөгөөд эе, эвээ ололцох, хамтын хөдөлмөр
эхлэх, гэрээ хэлцэл байгуулах, найр хурим хийх, бэр гуйх, инж өгөх,
авах, үнэт эрдэнийн зүйл авах, лус тахих, хур оруулах, зэтгэрийг
номхотгох зэрэг үйлд сайн хэмээн зурхайд зуржээ.
Монгол Улсын Ерөнхийлөгч Ц.Элбэгдорж "Луу” өдрийг сонгож, зарлиг
гарган, шинэ парламентын анхдугаар хуралдааныг хуралдуулсан нь цаанаа
учиртай гэнэ шүү.
Тодруулбал, Дөрвөн хүчтэний нэг хэмээгддэг "луу” өдөр шинэхэн УИХ-ын
гишүүдийн тангарагыг өргүүлсэн нь, Энэ цагаас хойш Эх орон маань "Дөрвөн
хүчтэн”-ий шидийг олж, Ирэх дөрвөн жилд Төрийн эрх барих дээдсүүд нь
хоорондоо эв, эетэй байж, хэлэлцэж гаргасан хууль, тогтоомж шийдвэр нь
бат бөх байхыг билэгдсэн ажээ.
Ер нь бол Монголчууд эртнээс арслан, бар, луу, хангарьд зэргийг
"Хийморийн дөрвөн их хүчтэн” буюу оюун ухаан, эр зориг, эрх чөлөө, эд
баялаг оршин тогтнох, эд юмсыг бат найдвартай хадгалж хамгаалах, муу
муухай зүйлээс ангижруулахын бэлгэдэл хэмээн шүтэж ирсэн гэдэг юм билээ.
Түүнчлэн, энэ өдөр Бурханы шашины тэргүүн 14-р Далай лам 77 насны сүүдэр зооглож байгаа сурагтай.
Ямартай ч, Монгол түмний минь сонголт мэргэн байж, энэ жилийн сонгууль тайван сайхан боллоо.
Харин сонгогдсон Эрхэм гишүүдийн оюун нь цэцэн, мэлмий нь тунгалаг байж, Ард олныхоо итгэлийг даахыг хүсье.
МОНГОЛ УЛС МАНДАН БАДРАГ… Хурай… Хурай… Хурай…
Б.Дэжид
www.T1771.Tk
