Улс төр::
УИХ-ын гишүүн Л.Хаянхярваагийн хэргүүдийг сэргээн шалгаж эхэлжээ
-АЛБАН ТУШААЛАА УРВУУЛАН АШИГЛАЖ, ДАРХАН-УУЛ АЙМГИЙН ИРГЭДЭД ЭХ ОРНЫ
XИШИГ ТАРААСАН ГЭХ ХЭРГИЙН МӨРДӨН БАЙЦААЛТ ДУУСЧ БАЙГАА ГЭНЭ-
УИХ-ын гишүүн Д.Хаянхярвааг АТГ-аас эрүүгийн хэрэг үүсгэн шалгаж
байгаа билээ. Түүнд хэд хэдэн шалтгаанаар эрүүгийн хэрэг үүсгээд байгаа
аж. АТГ-аас Д.Хаянхярвааг Дархан-Уул аймгийн XIX тойргоос УИХ-д нэр
дэвшихдээ хууль зөрчсөн үйлдлийг нь шалгаад дуусах шатандаа оржээ.
Д.Хаянхярваа нь өндөр настан болон хөгжлийн бэрхшээлтэй иргэдэд олгож
байгаа эх орны хишиг болох 330 мянган төгрөгийг өөрийн нэр дэвшсэн
тойрогтоо Сангийн сайдын албан тушаалаа урвуулан ашиглаж хүн бүрт 670
мянган төгрөг тараасан болох нь тогтоогдоод байгаа юм байна. Энэ талаар
АТГ-аас байцаалт авсан гэнэ.
Тэрбээр Дархан-Уул аймгийн иргэдэд эх орны хишиг болох 670 мянган
төгрөг тараасан гэдгээ хүлээсэн гэдгийг албаны эх сурвалж онцолж байна.
Мөн дээрх хэрэгт Сангийн яамны гурван мэргэжилтэн холбогджээ. Тэд
"Сайд л ийм шийдвэр гаргасан. Бид сайдын өгсөн үүрэг даалгаврын дагуу
ажлаа хийсэн” хэмээн мэдүүлжээ. Дээрх хэргээс гадна Д.Хаянхярваа
Дархан-Уул аймгийн Засаг дарга байхдаа хууль зөрчиж мөнгө угаасан гэгдэх
хоёр хэргийг сөхөн шалгаж эхэлжээ. Зам засварын ажлыг бүрэн гүйцэд
хийсэн мэтээр хуурамч баримт бүрдүүлэн, тав, есөн жилийн өмнөх өөр зураг
харуулж, 300 сая төгрөг авсан хэрэг 2007 онд гарсан байна. Дээрх хэрэгт
тэр үеийн Зам, тээвэр, аялал жуулчлалын яамны мэргэжилтэн
У.Эрдэнэбилэг, "Хотын зам” ХХК-ийн захирал Б.Атарбаяр, ерөнхий инженер
С.Төмөрбаатар нарыг холбогдуулан шалгаж байжээ.
Үүнээс гадна "Зоос” банкинд Х.Баатархүү хэмээх нэрээр 2004 оны
есдүгээр сарын 30-нд 2402009638 тоот данс нээгдсэн байдаг юм байна.
Дээрх данс руу цэцэрлэг, сургуулиудын халаалт, засварын мөнгө, төрийн
болон төсөвт байгууллагуудын дамын үнээр шахуулсан бараа, үйлчилгээний
үнэ зэрэг мөнгө энэ дансанд ордог байжээ. Хууль хяналтынхан Х.Баатархүү
гэгчийг ямар хүн байдгийг эрэн сурвалжилсан байна. Гэтэл Х.Баатархүү гэх
нэр нь хуурамч, хуурамч нэрээр данс нээж мөнгөний гүйлгээ хийдэг
байсныг тогтоожээ. Гэвч дээрх хэргийн цаад эзэд тодролгүй мэргэжилтнүүд
ял авч байсан юм байна. Харин өдгөө УИХ-ын гишүүн Д.Хаянхярваад дээрх
хэргийг холбогдуулан шалгаж байгаа аж.
Энэ мэт УИХ-ын гишүүн Д.Хаянхярваатай холбоотой гурван ч хэрэг
шалгагдаж эхэлсэн гэнэ. Дээрх хэргүүдийг Дархан-Уул аймгийн иргэдийн
төлөөлөл бүхий хүмүүс шалгаж өгөхийг АТГ-т хүсчээ. Тэд Д.Хаянхярваатай
холбоотой хууль бус үйлдэл хийж байж болох материалиудыг, хүсэлтийн хамт
АТГ-т өгсөн гэдэг. Хэрэв түүний гэм буруутай нь тогтоогдвол арав
хүртэлх жилийн хоригдох ял сонсох юм байна.
Э.ХҮРЭЛБААТАР
www.T1771.Tk
