Одоогоос 40 жилийн өмнө Дундговь аймгийн харьяат Ламцэрэн гэдэг залуу хээр явж байгаад аянганд цохиулан ухаан алджээ.Түүнийг хээр хэвтэж байхад нь Аймхай Довчин гэдэг хүн олж гэрт нь хүргэж өгөхдөө  "Ээ бурхан минь,сүнс нь аль хэдийн диваажинд оччихсон байх” гэжээ.Зун цаг байсан болохоор гэрийхэн нь өмхийрч муудахаас болгоомжлон маргааш өглөө нь оршуулж орхижээ.Харин Ламцэрэн өгүүлэхдээ түүнийг бороон дундуур хэсэг адуугаа хөөж явтал дээрээс нь хөх улаан гал маналзан бууж тэр мориноосоо унаж ухаан алджээ.Нэг мэдэхнээ тэр томоос том аяганд байжээ.Мань эрийн эргэн тойронд үй олон нүцгэн хүн дээр доороо оролцон дээш мацаж байлаа.Мөн дээрээс нь агшин тутамд хүн орилон унаж байв.Ламцэрэн яах ч ухаанаа олохгүй байтал үс толгой нь зулмарсан нэг хүүхэн түүнийг шууд л зодож нүдэн доороо хийжээ.Мань эр гайхан доош харвал тэр аяга цоорхой байх бөгөөд хүмүүс яг л ус шиг доош урсаж байжээ.Өөрийн мэдэлгүй доош унаж эхлэнгүүт Ламцэрэн дээш мацах санаатай нэгнийх нь хөлнөөс чангаатал шууд өшиглүүлж доош уруудав.Тэрбээр доош дахин харвал халуун тос буцалж хүмүүс тэр тос  руу унаж байгаа нь харагдлаа.Ламцэрэн унахгүйг хичээн дээш зүтгэтэл нөгөө эмэгтэй дахиад л толгой дээр нь гишгэж,бас нэг хүн хөлнөөс нь татаад тос руу нисгэчихэв.Энэ үед түүний чих шуугиж урьд өмнө нь үйлдэж байсан нүгэл хилэнцүүд нь бодогдож байж.Тэр халуун тосонд пүлхийтэл унасан ч бие нь өвдсөнгүй.Харин ч бүр таатай санагдсан тул шумбаж доошилбол тэртээ доор дахиад л нэг нүх байгаа харагджээ.Тэр нүхээр ортол ер бусын цагаан гэрэл цацарсан тул нүдээ аньжээ.Тэгээд нүдээ нээтэл тас харанхуйд хэвтэж байх бөгөөд толгой тархи нь жигтэйхэн өвдөж байж.Удсан ч үгүй хамаг бие нь хүйт даан бүгчим модон хайрцганд хэвтэж байгаагаа арайхийн мэдэрч авсанд байгаагаа мэджээ.Тэгмэгц тэр ихэд айн хөлөө атийж байгаад хар хүчээрээ хэд хүчтэй тийрэхэд авсных нь хавхаг задарч дээш гарч ирсэн байна.Түүний дээрээс тун бага шороо хийж оромдосны ачаар тэр амархан гарч ирсэн байна.Тэрбээр арайхийн гэртээ иртэл эхнэр хүүхэд нь айгаад сүйд болжээ.Ламцэрэн  Үүнээс хойш”Та нар намайг удаан унтвал амьдаар нь оршуулж мэдэх улс ” гэж гомдлох болсон бөгөөд тэрбээр одоогоос 2 жилийн өмнө нас барсан юм.Тэр үед эхнэр хүүхэд нь түүний үхснийг баттай мэдсэний дараа оршуулжээ.Гэхдээ метр гаруй нүх ухаж авсаа хийгээд дараа нь сайн гэгч нь цементлэсэн байна.Ламцэрэн  амьдралынхаа сүүлчийн мөчийг хүртэл "Диваажин гэж байхгүй.Харин там гэж бий.Тэнд тийм ч аймаар юм байхгүй” гээд дээрхи түүхийг ярьдаг байлаа.