"Мөрөөдөгчид” хүснэ, шунана

Үзэгч, кино сонирхогчдодоо үргэлж гэнэтийн бэлэг барьдаг сонгодог, артхаус кино сонирхогчдын "Алтан хальс” холбоо нь Засгийн газрын хэрэгжүүлэгч агентлаг Соёл урлагийн хороо, залуусын оролцоог дэмжигч "Be brand”, "М club-М сinema” хамтран энэ бямба гаригийн "Dreamers’ day” кино өдөрлөгөөрөө найруулагч С.Бямбын "Хүсэл шунал” баримтат киног гаргахаар боллоо. 

Өнгөрөгч оны Пусан, Дубай, Тайванийн олон улсын кино наадамд амжилттай оролцож, "Гоо марал” наадмаас оны шилдэг бүтээлээр шалгаран, энэ оны Гётобург, Тайланд, Сан Францискогийн олон улсын кино наадмуудад Монголынхоо нэрийг гаргасан энэ бүтээл Монгол киноны ноён оргилын нэг, нэрт кино найруулагч, зураглаач, Төрийн шагналт Дэжидийн Жигжид, түүний хүү Ж.Биндэр нарын амьдрал, уран бүтээлээр XX зууны Монголын кино урлагийг тольдсон кино юм. 

"Алтан хальс” холбооныхонд сүүлд ирсэн мэдээллээр энэ сарын 12-22-ний өдрүүдэд Италийн Ром хотноо болж өнгөрсөн Asiatica кино наадмаас "Хүсэл шунал” Шилдэг баримтат киноны шагналыг авсан байна. 

"Хүний наймаа” киногоо орон нутгийн үзэгчдэд хүргэхээр зүүн аймгуудын нутгаар зорчсон Ж.Биндэр найруулагчийн аялал "Хүсэл шунал”-ын гол өгүүлэмж. Зам зуур С.Бямба найруулагч сайн андын хувьд түүнтэй аавынх нь тухай, Монголын кино урлаг, урлаг соёлын ирээдүйн тухай хууч хөөрнө. "Хүний мөр” киноны батлагдаагүй хэсэг, "Мандухай цэцэн хатан” киноны эвлүүлгээс хасагдсан кадр болон Д.Жигжидийн кино хальсанд үлдсэн сүүлчийн дүр төрх гээд ховор дүрс, бичлэг тэдний яриан дундуур зэрвэс үзэгдэнэ. Гэхдээ энэ кино зөвхөн дурсамж дуртгалын тухай биш, нэгэн цагт байсан ч одоо оргүй алга болсон юмсыг гунигтайяа нэхэн санаж босгосон хөшөө баримал биш. Харин урлагийн мөнхийн шид, хүний сэтгэлд эгнэгт байх хүсэл, найдварын тухай гэхэд болно.

"Алтан хальс” холбоо энэ сард Орчин цагийн залуу мастерууд сэдвийн хүрээнд кино өдөрлөгөө зохион байгуулж буй бөгөөд энэ цагийн Монголын кино урлагт түүчээ нь болсон уран бүтээлчийн нэг хэмээн С.Бямба найруулагчийг сонгожээ. Туйлын завшаантай нь, "Dreamers’ day” өдөрлөгт найруулагч өөрийн биеэр оролцож, "Алтан хальс”-ын залуус болон үзэгч олонтой халуун дотно яриа өрнүүлнэ. Өдөрлөг энэ бямба гаригийн 15.00 цагт М клубд болно.