Ука-"Танго"

"Киви" хамтлагийн ахлагч, дуучин Ука манай сайтын уншигчдын мэлмийд цоо шинэ клипээ толилуулж байна. Түүний бие даасан анхны цомогт багтсан "Танго" дууны үг, аяыг Ганг зохиосон бол хөгжмийн найруулгыг нь Оки хийжээ. Харин клипийг "Lemon" продакшны уран бүтээлчид хийж гүйцэтгэсэн байна. Мөн тус дууны клипэнд гарах бүжгийг "Star Dance" бүжгийн клубийн багш Баачка дэглэсэн бөгөөд өөртэй нь хамт Чинзориг хэмээх залуу танго бүжсэн талаар дуучин Ука ярив.

Энэ дуу нь гурван клиптэй бөгөөд эхний байдлаар үндсэн клип мөн дан танго бүжиглэсэн хоёр клипийг үзэгчдэд түрүүлэн хүргэж байгаа бол дараа нь студид хоолой бичүүлж буй дүрсээ клип болгон үзэгчдэд хүргэх юм байна.

Дашрамд, дуучин Укагийн "I am In Love" цомгийн баяр энэ сарын 30-нд болох мэдээлэл өмнө нь цацагдсан билээ. Тэрбээр цомгийн баяр болох өдрийг түр хугацаагаар хойшлуулсан бөгөөд ирэх сарын 13-нд "HI-FI" рекордсын төв дээр 12 цагаас хийхээр болсныг мэдээллэв.

Энэ өдөр тэрбээр цомгийн баяраа үзэгч, фенүүдийн хамт хийгээд орой нь дуучин Н.Наранбаатарын "Strangers in the night" тоглолтод оролцох гэсэн. Тэрбээр дуучин Наагийтай хамт алдарт "Something Stupid" дууг үзэгчдэд дуулж сонирхуулах ажээ. Тэдний хэрхэн хоршихыг "Тусгаар Тогтнолын Ордон"-д дөрөвдүгээр сарын 13-нд 19 цагаас болох "Strangers in the night" тоглолтон дээр сонсож болох нь.