Соёл урлаг ::

"Дижитал” хамтлагийнхан тун удахгүй фэнүүддээ бэлэг барина

Хип хоп холбооны ерөнхийлөгч гэсэн дааж боломгүй том алдрыг өөртөө хайрлачихсан атлаа гавьтай дуулж чаддаггүй Баабарыг хамтлагаасаа жийснээр уран бүтээл нь улам ч ахицтай буй хамтлаг бол 10 гаран жилийнхээ уран бүтээлээр хүн бүрийн танил болсон "Дижитал”. Тус хамтлагийнхан өдгөө дөрвүүлээ уран бүтээлээ туурвиж, хэд хэдэн хит уран бүтээлийг гаргаад байгаа. Баабаргүйгээр харин ч урагшаа явж байна гэж фэнүүдээсээ улам ч их үнэлгээ авах болсон тэд өнгөрсөн жилээс хойш тоглолтынхоо сургийг гаргачихаад өдрөө зарлахгүй хүмүүсийг ихээр чилээсэн.

Тэгвэл "Дижитал” хамтлагийн эргэн сэргэж, уран бүтээлээ шинээр туурвиснаас хойшхи хийх гэж байгаа анхны тоглолтын тов гарч байгаа бололтой. Хосуудын өдөр гэж нэрлэгддэг хоёрдугаар сард УБ палас, Бөхийн өргөө, Улсын цирк гэсэн тоглолт хийж болохуйц газруудын захиалга аль хэдийнэ дүүрчээ.

Эдгээр захиалгуудын нэгийг "Дижитал” хамтлаг хийсэн байна лээ. Хоёрдугаар сарын 14,15 гэсэн хоёр өдөр тус хамтлаг өөрсдийн бие даасан тоглолтоо хүргэхээр зэхэж байгаа нь ийнхүү тодорхой болов. Харин хамтлагийн гишүүдээс үүнийг тодруулбал мэдээллийг бататгаж байгаа бөгөөд тэр ч бүү хэл facebook-д идэвхтэй ажиллах "Дижитал” хамтлагийн хуудсыг нээж, залуусын санал хүсэлтийг авч, уралдаан зарлаж эхлээд байгаа юм байна.