Спорт ::
Дэвид Бекхэмийг зодог тайлсан тухай алдартнууд юу гэж ярив

Английн шигшээ багийн экс ахлагч, Францын ПСЖ клубийн хагас хамгаалагч Дэвид Бекхэм

Их Британийн Ерөнхий сайд Дэвид Камерон: Түүнд Их Британи, Умард Ирландын нэгдсэн вант улсын иргэд талархан мэхийх ёстой

Тэр бол Английн төдийгүй дэлхий нийтийн шүтээн болсон тоглогч. Түүнд Их Британи, Умард Ирландын нэгдсэн вант улсын иргэд талархан мэхийх ёстой. Дэвид Бекхэмийн тоглолтын хэв маяг Английн шигшээд үгүйлэгдэнэ.



Дэвид Бекхэм Английн шигшээ багийн өмсгөлтэйгээр дахин талбайд гарахыг маш их хүсэж байсан. Энэ тоглолт нь түүний хувьд хамгийн сүүлчийнх байсан учир англичуудын өмнө зодог тайлахыг хүсэж байсан. Гэвч шигшээ багийн дасгалжуулагч Рой Хожсон түүнийг дахин дуудахгүй гэж Дэвид Бекхэмд хэлсэн бололтой. Тиймээс тэр ПСЖ-ийн сүүлчийн тоглолтын үеэр талбайг орхиж байна.

Бразилийн хөлбөмбөгийн шигшээ багийн экс довтлогч Роналдо Луис Назарио де Лима: Бекхэм яг одоо намайг зодог тайлж байсан үеийн гунигийг мэдэрч байгаа

Би Дэвид Бекхэмтэй "Реал Мадрид”-ын бүрэлдэхүүнд тоглож байсандаа өөрөөрөө бахархдаг. Намайг зодог тайлж байхад тэр над руу утсаар ярьж ийм зүйл хөлбөмбөгч бүрт тохиолддог гэдгийг хэлж байсан. Ногоон талбайд дахин тоглохгүй гэдэг хөлбөмбөгчдийн хувьд сэтгэлийн эзгүйрэл авчирдаг. Дэвид Бекхэм яг одоо намайг зодог тайлж байсан үеийн гунигийг мэдэрч байгаа.

"Реал Мадрид” клубийн дасгалжуулагч Жозе Моуриньо: Талбайн баруун талд өөрийгөө ямар тоглолт үзүүлэх ёстой талаар тэр сайн мэддэг

Дэвид Бекхэм бол ухаалаг тоглогч. Жигүүрийн хагас хамгаалагч, багийн ахлагч ямар байх ёстойг түүнтэй хамт тоглож байсан хөлбөмбөгчид мэдэрсэн болов уу. Тэр өөрийгөө нэг чадвар дээр сайжруулах талаар онцгой анхаардаг ховор хөлбөмбөгч л дөө. Жишээлбэл, хаалттай, чөлөөт цохилт, холын дамжуулалтыг яг эзэнд нь өгч чаддаг. Сир Алекс Фергюсон түүний энэ чадварыг улам хөгжүүлж чадсан. Дэвид Бекхэм ч зүтгэл гаргасан. Талбайн баруун талд өөрийгөө ямар тоглолт үзүүлэх ёстой талаар тэр сайн мэддэг.

Английн шигшээ, МанЮ-гийн экс хамгаалагч Гарри Невилл: Түүнд сир цол олгоно гэдэгт эргэлздэггүй

Дэвид Бекхэм бол чадварлаг тоглогч. "Улаан чөтгөрүүд”-ийн бүрэлдэхүүнд түүнтэй хамт тоглож байхад би довтолгоо эхлүүлэх асуудал дээр санаа зовдоггүй байсан. Мөн тэр бол хамгийн сайн ярилцагч байж чаддаг. Бэлтгэл дээр бусад тоглогчдод өөрийн чадвараа зааж өгөх, хэрхэн тоглохыг дасгалжуулагчаас дутахааргүй зөвлөдөг. Энэ нь талбайд биднийг эмх замбараатай тоглоход нөлөөлдөг байсан. Хатан хаан II Элизабет түүнд сир (гүнтэн, язгууртан) цол олгоно гэдэгт эргэлздэггүй. Тэр олон жилийн турш Английн нүүр царай байсан шүү дээ.

Спортын нэвтрүүлэгч Энди Грей: Дэвид Бекхэм Английн хөлбөмбөгийн удирдлагуудаас шигшээ багт дахин багтах эрх гуйхгүйгээр зодог тайлсан

Миний бодлоор англичууд Дэвид Бекхэмийг сүүлчийн удаа шигшээ багийнхаа нэрийн өмнөөс талбайд тоглохыг хүлээсэн. Гэвч Рой Хожсон түүний болоод англичуудын битүүхэн хүсэлтийг авч үзсэнгүй. Дэвид Бекхэм Английн хөлбөмбөгийн холбоо, Спортын яам зарим нэг нөлөө бүхий лордуудад хандаж шигшээ багт дахин багтах хүсэлтээ илэрхийлсэн гэж зарим хэвлэлд бичсэн. Би үүнтэй санал нийлэхгүй байна. Дэвид Бекхэм Английн хөлбөмбөгийн удирдлагуудаас шигшээ багт дахин багтах эрх гуйхгүйгээр зодог тайлсанд итгэлтэй байна.

Холливудын жүжигчин Том Круз: Түүний сүүлчийн тоглолтыг үзэж чадаагүйдээ сэтгэл дундуур байна

Би Дэвид Бекхэмийн сүүлчийн тоглолтыг үзээгүйдээ сэтгэл дундуур байна. Тэр "ЛА Галакси” клубт тоглож байхад бид гэр бүлийн сайхан найзууд болсон. Би тоглолтуудыг нь аль болох алгасахгүй үздэг. Хэдхэн хоногийн өмнө утсаар ярихад Дэвид Бекхэм гунигтай байсныг би анзаарсан. Гэтэл гэнэт зодог тайлчихлаа. Тэр олон жил өндөр хэмжээний тоглолт үзүүлсэн тун чадварлаг хөлбөмбөгч.

Италийн загвар зохион бүтээгч Жоржио Армани: Дэвид Бекхэмээс өөр спортын ямар ч алдартан загварын ертөнцөд түүн шиг амжилт үзүүлээгүй байна

Би Дэвид Бекхэмтэй олон удаа хамтран ажилласан. Тэр бол загварын асар их мэдрэмжтэй хүн. Модель байж чаддаг. Эхнэр Викториа ч энэ талаар онцгой нэгэн. Дэвид Бекхэм зодог тайллаа ч түүнд сурталчилгааны санал ирнэ. Тэр ойрын хэдэн жилдээ загварын шүтээн хэвээр байна. Дэвид Бекхэмээс өөр спортын ямар ч алдартан загварын ертөнцөд түүн шиг амжилт үзүүлээгүй байна.

$IMAGE2$
$IMAGE3$