Танин мэдэхүй::

  Фэйсбүүкт донтохыг архидалттай дүйцүүлэв

Фэйсбүүк нийгмийн сүлжээнээс хамааралтай болох явдлыг согтууруулах ундаа юм уу хар тамхины донтолттой болох үзэгдэлтэй адилтгаж үзэж болно гэнэ. Холбогдох судалгааны ажлыг явуулсан Олбани их сургуулийн эрдэмтэд ийм дүгнэлтэд хүрчээ. Одоо тэд үүнийгээ албан ёсоор хүлээн зөвшөөрүүлэхийг зорих аж.

Америкийн судлаачид өөрсдийн явуулсан туршилтад 18-аас дээш насны 292 оюутан залууг хамруулав. Тэднээс нийгмийн сүлжээнд хэрхэн ханддаг байдлыг нь асууж, үнэлж дүгнэсэн байна. Гэтэл туршилтад хамрагдсан залуусын 90 гаруй хувь нь нийгмийн сүлжээнээс нэлээн хамааралтай болсон нь тодорхой болжээ. Тэд цахим ертөнцөд өнгөрүүлдэг нийт хугацааныхаа гуравны нэг орчмыг чухам фэйсбүүкт л зарцуулж байв.

Тиймээс эрдэмтэд фэйсбүүкт донтох явдлыг нэг ёсны хамааралд орох үзэгдэл гэж үзээд холбогдох эмчилгээг нь боловсруулахыг уриалав.